Phili 2 | BOJ | STEP | Kristus a na nuŋgo are siŋgilatetŋgeqnu e? A na niŋgi qalaqalaiŋgoqnsiqa nuŋgo are latetŋgeqnu e? Qotei aqa Mondor a na niŋgi beterŋgejunu e? Niŋgi nuŋgo was naŋgi qa are boleiŋgeqnaqa naŋgi qa duleqnub e?

Philippians 2

Niŋgi areqalo qujaitosib qalaqalaiyo kumbra dauryoqniye

1 Kristus a na nuŋgo are siŋgilatetŋgeqnu e? A na niŋgi qalaqalaiŋgoqnsiqa nuŋgo are latetŋgeqnu e? Qotei aqa Mondor a na niŋgi beterŋgejunu e? Niŋgi nuŋgo was naŋgi qa are boleiŋgeqnaqa naŋgi qa duleqnub e? 2 Degsi sqas di niŋgi kumbra bole bole yoqnibqa e niŋgi qa tulaŋ areboleboleiboqnqas. Kumbra bole agiende. Niŋgi kalil are qujaitosib qalaqalaiyo kumbra dauryosib soqniye. Sosib niŋgi areqalo qujai na Qotei aqa wau yoqniye. 3 Niŋgi nuŋgo segi jejamu qa are qalaib. Niŋgi nuŋgo segi ñam soqtqa are qalsib wauaib. Niŋgi nuŋgo segi ñam aguq atoqnsib endegsib are qaloqniye, “Ijo Kristen was qudei naŋgo kumbra tulaŋ boledamu. Naŋgo kumbra dena ijo kumbra buŋyejunu.” 4 Niŋgi nuŋgo segi iŋgi iŋgi qa are qaloqnsib gereiyoqnaib. Niŋgi nuŋgo was naŋgi qa are qaloqnsib naŋgo iŋgi iŋgi dego gereiyetnjroqniye. Yim naŋgi bole sqab.

Kristus a aqa segi ñam aguq atej deqa Qotei na a olo ŋam kobaquja yej

5 Niŋgi Kristus Yesus aqa areqalo ojsib dauryoqniye. 6 Kristus a segi Qotei. Ariya a deqa are qalosaioqnej. 7 Aqa ñam di a ojqa uratosiqa a tamo bulyosiqa a wau tamo laŋaj bul soqnej. 8 Deqa tamo kalil naŋgi a unoqneb a tamo soqnej. Sosiqa aqa segi ñam aguq atsiqa Qotei aqa anjam dauryosiq moiej. Od, a ŋamburbasq di moiej. 9 Onaqa Qotei na aqa ñam olo soqtetosiqa laŋ qureq osi oqej. Od, Qotei na a ñam tulaŋ kobaquja yej. Deqa bini aqa ñam dena ñam kalil tulaŋ buŋnjrejunu. 10 Qotei na ñam di Yesus yej deqa mondoŋ laŋ aŋgro kalil naŋgi ti tamo kalil naŋgi ti iŋgi iŋgi kalil laŋ ti mandam ti mandam sorgomq di unub qaji naŋgi ti Yesus aqa areq di siŋga pulutosib aqa sorgomq di sqab. 11 Osib naŋgo medabu qujaitosib maroqnqab, “Yesus Kristus a segi Tamo Koba.” Yim kumbra dena naŋgi na Abu Qotei aqa ñam tulaŋ soqtoqnqab.

Niŋgi tamo uŋgasari naŋgo ambleq di sosibqa niŋgi suwaŋ qa kumbra naŋgi osornjroqniye

12 Ariya was qu, e qalieonum, niŋgi gaigai ijo anjam dauryeqnub. Ariya bini niŋgi olo siŋgila na dauryoqniye. E niŋgi koba na sqai bati deqa segi sai. Bini e isaq endi unum deqa niŋgi ijo anjam dauryqa urataib. Niŋgi ijo anjam olo siŋgila na dauryoqniye. Qotei na niŋgi padalo sawaq dena eleŋej deqa niŋgi ulaosib siŋgila na wauoqniye. 13 Iga qalie, Qotei a nuŋgo are miligiq di waueqnu. A segi na nuŋgo are tigeltetŋgeqnaqa niŋgi kumbra a tulaŋ areareteqnu qaji di yeqnub. A na niŋgi siŋgilatŋgeqnu deqa niŋgi kumbra di yeqnub.

14 Ariya kumbra kalil niŋgi yeqnub qaji di niŋgi lawo na sosib yoqniye. Niŋgi anjam laŋa laŋa maroqnsib anjam na qotoqnaib. Niŋgi kumbra bole yoqniye. 15 Niŋgi kumbra degyqab di niŋgi Qotei aqa aŋgro boledamu une saiqoji sqab. Sosib niŋgi ŋambile gaigai sqajqa anjam ojesosib mandam qa tamo uŋgasari naŋgo ambleq di laqnsib suwaŋ qa kumbra naŋgi osornjroqnqab. Tamo uŋgasari naŋgi di kumbra bole dauryqa uratoqnsib olo kumbra uge uge yeqnub. Deqa mondoŋ Kristus a olo bosim naŋgo une deqa naŋgi peginjrqas. Yim bati deqa e nuŋgo kumbra bole qa tulaŋ areboleboleibim e qalieqai, ijo wau kalil e nuŋgo ambleq di yoqnem qaji di e laŋa yosaioqnem.

17 O was qu, nuŋgo areqalo Yesus qa siŋgilateqnub qaji di niŋgi Qotei atraiyobuleqnub. Jeu tamo naŋgi na e lubib ijo leŋ wain bul aiqas de ti nuŋgo areqalo de ti turtosiy dena Qotei atraiyobulqai. E moiqai di uŋgum. E deqa tulaŋ areboleboleibqas. Osiy niŋgi ti koba na areboleboleigim sqom. 18 Dego kere niŋgi dego areboleboleiŋgim e ti koba na areboleboleigim sqom.

Pol na Timoti qariŋyonaq a Filipai naŋgi qa gilej

19 Tamo Koba Yesus a na e odbimqa sokiñala e Timoti qariŋyit a niŋgi qa gilqas. Gilsim olo puluosim e qa bosim nuŋgo kumbra qa e saibqas. Yim e qusiy are siŋgilatqai. 20 Timoti a gaigai niŋgi qa are qaloqnsiq deqa a na niŋgi aqaryaiŋgwajqa gam ŋameqnu. Tamo deqaji bei endi sosai. Aqo Timoti wo segi niŋgi qa are qaleqnum. 21 Tamo kalil naŋgi naŋgo segi jejamu qa are koba qaleqnub. Naŋgi Yesus Kristus aqa wau qa are qalosaieqnub. 22 Timoti aqa kumbra tulaŋ boledamu di niŋgi qalie. Niŋgi qalie, a na e aqaryaiboqnsiqa Yesus aqa anjam bole mare mare laqnu. Aŋgro naŋgi na naŋgo abu naŋgi aqaryainjreqnub dego kere Timoti a na e aqaryaibeqnu. 23 Deqa e kiñala tariŋosiy kumbra kie jeu tamo naŋgi na e ebqab di qalieosiy Timoti qariŋyit a niŋgi qa boqujatosim saiŋgwas. 24 E endegsi qalieonum. Tamo Koba Yesus a na e gam waqtetbimqa sokiñala e segi dego niŋgi qa bosiy nuŋgwai.

Pol a Epafroditus dego qariŋyqa marej

25 E nami endegsi are qalem, e Epafroditus dego qariŋyit niŋgi qa bqas. A gago Kristen was bole. A e ombla wau qujai. Aqo ombla qatqarosim jeu tamo naŋgi ti qoteqnum. Nami niŋgi na a qariŋyonab a e qa bosiqa aqaryaibej. 26 A niŋgi nuŋgwajqa are koba qaleqnu. A qalie, a nami maiyonaqa niŋgi di qusibqa a qa are gulubeiŋgej. 27 Bole, a makobaiyonaq moiqa jojomej. Ariya Qotei a a qa dulosiqa olo boletej. Qotei a a qa segi dulosai. A e qa dego dulej. Di kiyaqa? E olo tulaŋ are gulubekobaibaim deqa. 28 Deqa was qu, e arebolebole na Epafroditus qariŋyonam niŋgi qa bej. Niŋgi a unsibqa tulaŋ areboleboleiŋgwajqa deqa marsim a qariŋyonam niŋgi qa bej. Deqa e dego olo are gulubeibqasai. 29 Deqa niŋgi Epafroditus a qa tulaŋ arebolebo-leiŋgim Tamo Koba Yesus aqa ñam na gereiyoqniye. Niŋgi tamo bole deqaji kalil naŋgo ñam gaigai soqtoqniye. 30 Epafroditus a Kristus aqa wau ojsiq deqa a moiqa jojomej. A aqa segi jejamu bole sqajqa deqa are qalosaioqnej. Agi niŋgi na Epafroditus wau yonabqa a na e aqaryaiboqnej. A wau deqa segi are qaloqnej.